ABŞ-ın Ukrayna ilə yeni razılaşması

ABŞ-ın Ukraynaya dəstəyi ilə bağlı kəskin dönüş edən Donald Tramp, iki həftə əvvəl Ukraynaya hərbi yardım ehtiyat çatışmazlığı səbəbilə dayandırılsa da, Vaşinqtonun Kiyevə yenidən silah göndərəcəyini elan edib.

Ajans.az euronews-a istinadən xəbər verir ki, ABŞ Prezidenti Donald Tramp bazar ertəsi günü Avropa müttəfiqlərinin milyardlarla avro dəyərində ABŞ hərbi texnikası alaraq onu Ukraynaya ötürməsini nəzərdə tutan bir planı dəstəklədiyini açıqlayıb. Bu addım, Rusiya hücumlarının intensivləşdiyi bir vaxtda Kiyev üçün hava hücumundan müdafiəni gücləndirmək məqsədi daşıyır.

Yeni razılaşmaya əsasən, ABŞ silahları NATO üzv ölkələrinə satacaq, həmin ölkələr isə bu silahları Ukraynaya təhvil verəcəklər.

Tramp razılaşmanın bütün detalları barədə məlumat verməsə də, söhbət “milyardlarla” dəyərində silahlardan getdiyini deyib. Razılaşmaya Patriot hava hücumundan müdafiə sistemləri və onların raketləri də daxildirmi sualına isə “Hər şey daxildir” cavabını verib.

Ukrayna dəfələrlə ABŞ-dan daha çox Patriot sistemi və ona uyğun raketlər tələb edib — çünki bu sistem dünyada daxil olan ballistik raketləri etibarlı şəkildə vurub salmaq qabiliyyətinə malik nadir hava müdafiə sistemlərindən biridir.