Tramp: Hər şeyi ələ keçirmək istəyir

“Hər şeyi ələ keçirmək istəyir”. Tramp Makrona bildirib ki, Putin Ukraynada hücumu davam etdirmək niyyətindədir.

Ajans.az xəbər verir ki, ABŞ prezidenti Donald Trampın qərarı ilə Ukraynaya silah tədarükü bərpa olunur. Artıq yeni Patriot hava hücumundan müdafiə sistemlərinin verilməsi elan olunub, həmçinin Vaşinqtonun Kiyevə hücum xarakterli silahlar təqdim etmək niyyətində olduğu bildirilir.

Axios nəşrinin məlumatına görə, Trampın bu addımı atmasına səbəb olan əsas amillərdən biri onun 3 iyulda Rusiya prezidenti Vladimir Putinlə telefon danışığı olub. İddiaya görə, həmin söhbətdə Putin “növbəti iki ay ərzində Rusiyanın mühüm mövqelərə malik olduğu Ukrayna bölgələrinin inzibati sərhədlərinə qədər yeni hücumlara başlayacağını açıq şəkildə ifadə edib”. Burada söhbətin Ukraynanın beynəlxalq səviyyədə tanınan ərazilərindən getdiyi, yoxsa Rusiya tərəfindən anneksiya olunmuş yeni “regionlardan” (ABŞ bu ərazilərin Rusiyaya birləşdirilməsini tanımır) bəhs edildiyi dəqiqləşdirilmir.

Bu danışıqdan bir gün sonra Tramp Fransa prezidenti Emmanuel Makronla da əlaqə saxlayıb. Məlumata görə, Tramp həmin söhbətdə Makrona “Putin hər şeyi ələ keçirmək istəyir” deyib.

Axios həmçinin qeyd edir ki, son iki həftə ərzində Tramp Rusiyanın Kiyevə və digər şəhərlərə hücumlarını artırması və Putinin atəşkəsə razı olmaması səbəbindən getdikcə daha çox narazılıq hiss etməyə başlayıb.