İşdən çıxırılan nazir müavini kimdir? -  DOSYE

Xəbər verdiyimiz kimi Azərbaycanın gənclər və idman nazirinin müavini Mariana Vasileva vəzifəsindən azad olunub.

Ajans.az işdən çıxarılan nazir müavininin dosyesini təqdim edir:

Mariana Vasileva 1974-cü il iyulun 6-da Bolqarıstanda anadan olub. Müqəddəs Kiril və Mefodiy adına Veliko Tarnovo Universitetini bədən tərbiyəsi və idman ixtisası üzrə bitirib.

2013-cu ildə “Azərbaycan Respublikasının Əməkdar məşqçisi” fəxri adına layiq görülüb. 2015-ci ildə Birinci Avropa Oyunlarında əldə etdiyi nəticələrə görə, Azərbaycan Respublikası Prezidentinin “Fəxri diplomu”, 2019-cu ildə isə Beynəlxalq Gimnastika Federasiyasının “Əməkdar məşqçi” diplomu ilə təltif edilib.

2001-2003-cü illərdə bədii gimnastika üzrə Türkiyə milli komandasında, 2003-2008-ci illərdə Bolqarıstanın “Levski” (Sofiya) idman klubunda, 2004-2008-ci illərdə isə bədii gimnastika üzrə Bolqarıstan milli komandasında məşqçi olaraq fəaliyyət göstərib.

2009-cu ildən etibarən Azərbaycan bədii gimnastika milli komandasının baş məşqçisi vəzifəsində çalışıb.

Azərbaycan Prezidentinin 29 noyabr 2021-ci il tarixli Sərəncamı ilə Azərbaycan Respublikası gənclər və idman nazirinin müavini vəzifəsinə təyin edilib.

Qeyd edək ki, bu ayın əvvələrində ölkə mətbuatında Mariana Vasilevanın Beynəlxalq Gimnastika Federasiyasının tərəfindən idmandan ömürlük diskvalifikasiya edildiyi barədə xəbərlər yayılıb. Həmin xəbərlərdə o, idmançılara qarşı fiziki zorakılıqda günahlandırılıb.