İranın xarici işlər naziri: Yaxın Şərqdəki vəziyyətə görə ABŞ-la danışıqlar dayandırılıb

Omanın vasitəçiliyi ilə ABŞ-la danışıqlar prosesi Yaxın Şərqdəki xüsusi vəziyyətə görə dayandırılıb.

Ajans.az-ın "IRNA"ya istinadən xəbərinə görə, bunu İranın xarici işlər naziri Abbas Əraqçi Maskata səfəri zamanı deyib.

“Bölgədəki xüsusi vəziyyətə görə hazırda Maskat prosesi dayandırılıb. İndi biz danışıqlar üçün əsas görmürük. İndiki böhrandan çıxa bildikcə, bu işə qayıdıb-qayıtmayacağımıza qərar verəcəyik.

Həm ABŞ, həm də Avropa ölkələri və region ölkələri İranın mövqeyinin nə olduğunu bilməlidirlər. Bizim mövqeyimiz tamamilə aydındır, biz dəfələrlə təkrar etmişik ki, biz müharibə və münaqişələr istəmirik; Biz buna tam hazır olsaq da, hesab edirik ki, diplomatiya bunun baş verməməsi üçün çalışmalıdır.

Region yüksək hazırlıq vəziyyətindədir və genişmiqyaslı münaqişələr astanasında ola bilər və diplomatiya böyük böhranların qarşısını almaq, gərginliyin və müharibənin artmasının qarşısını almaq üçün yeganə yoldur”, - deyə İranın xarici işlər naziri bildirib.