İran XİN Rusiya ilə razılaşmanın təfərrüatlarını AÇIQLADI
Rusiya və İran arasında hərtərəfli strateji tərəfdaşlıq haqqında saziş müdafiə və təhlükəsizlik məsələlərini də əhatə edəcək.
Ajans.az xəbər verir ki, sazişin təfərrüatlarını İslam Respublikası Xarici İşlər Nazirliyinin rəsmi nümayəndəsi İsmail Bəqai açıqlayıb.
“Bunun mühüm hissəsi ticarət-iqtisadiyyat, enerji, o cümlədən müdafiə və təhlükəsizlik məsələləridir. Bu saziş mövcud 2001-ci il sazişini yeniləyəcək və tamamlayacaq”, - diplomat bildirib. Onun sözlərinə görə, o vaxtdan Tehran və Moskva əməkdaşlığın əhatə dairəsini xeyli genişləndiriblər.
Daha əvvəl sazişin məzmununun təfərrüatlarını Rusiyanın xarici işlər naziri Sergey Lavrov açıqlayıb. Rusiya Xarici İşlər Nazirliyinin rəhbəri qeyd edib ki, saziş regional və qlobal səviyyədə sülh və təhlükəsizlik maraqları naminə qarşılıqlı fəaliyyətin gücləndirilməsinə xüsusi diqqət yetirir, Moskva və Tehranın təhlükəsizlik və müdafiə sahələrində daha sıx əməkdaşlıq etmək istəyini təsbit edir.
