Rəsmi Bakı Almaniyaya necə üzr istətdi? - DETALLAR
“Azərbaycan tərəfi Almaniyaya adekvat cavab verdi, dərs verdi. Hələ Azərbaycan çox da dərinə getmədi. Faşist Almaniyası tarixini xatırlatmaq lazım gəlsəydi, bunu da edərdik”.
Bunu Ajans.az-a açıqlamasında siyasi şərhçi Əziz Əlibəyli deyib. O bildirib ki, bu gün Almaniyanın Azərbaycana ehtiyacı varsa, Cənubi Qafqaz siyasətini formalaşdırmaq üçün Azərbaycan kimi güclü tərəfdaşla işbirliyinə gedəcəksə, qondarma rejimin adını çəkməməlidir:
“Heç rejimin özü yoxdur. Tarixin zibilliyində olan bir separatçı rejim üçün tərəfdaşlıq edəcəyin ölkəni itirmək olmaz. Azərbaycan buna olduqca sərt reaksiya verdi və bu reaksiyaların ardınca Almaniya prezidentinin Bakıya gözlənilən səfərinə eyham vuruldu ki, biz bunu qəbul etməyə də bilərik. Əlbəttə bu, ciddi təxribat idi”.
Əziz Əlibəyli eyni zamanda qeyd edib ki, ermənilərlə almanların münasibətləri də tarix boyu heç də yaxşı olmayıb:
“Ermənilər 1915-ci il hadisələrinin əsas səbəbkarı kimi Osmanlının arxasında duran Almaniyanı görürdülər”.
Xatırladaq ki, Almaniya prezidenti Frank-Valter Ştaynmayerin rəsmi sosial media hesabında paylaşılan postda qondarma separatçı rejimin bayrağı əks olunub. Bu, Azərbaycanın kəskin reaksiyasına səbəb olub və Almaniya səfiri XİN-ə çağırılıb, Azərbaycan Almaniya tərəfindən ictimai şəkildə üzrxahlıq edilməsini tələb edib.
Almaniya tərəfi bu postun səhvən yerləşdirildiyini etiraf edərək onu dərhal çıxarıb. Almaniya Prezidenti Administrasiyasının rəhbəri adından ünvanlanmış məktubda baş vermiş bu hadisəyə görə üzrxahlıq ifadə olunaraq, məktubun mediaya verilməsinə razılıq bildirilib.
© Materiallardan istifadə edərkən hiperlinklə istinad olunmalıdır.
