22 rahib böyük həcmdə narkotiklə SAXLANILIB

Şri-Lankada hüquq-mühafizə orqanları 22 Buddist rahibini külli miqdarda narkotik vasitə daşımaqda şübhəli bilinərək saxlayıb.

Ajans.az “Daily Mirror” qəzetinə istinadən xəbər verir ki, əməliyyat Kolombo şəhərinin şimalında yerləşən Bandaranaike Beynəlxalq Hava Limanında həyata keçirilib. Rahiblərin baqajından ümumilikdə 110 kq-dan çox narkotik vasitə aşkarlanıb ki, bu da hava limanının tarixində ən böyük müsadirələrdən biri hesab olunur.

Məlumata əsasən, Taylanddan gələn şəxslərin çamadanlarında təxminən 112 kq kannabis və həşiş gizlədilib. Qanunsuz yükün ümumi dəyərinin 1,1 milyard Şri-Lanka rupisindən (təxminən 3,45 milyon dollar) çox olduğu bildirilir. Saxlanılan şəxslər bazar günü Neqombo rayonunda məhkəməyə çıxarılıb.

İstintaq zamanı müəyyən edilib ki, əməliyyat ölkənin qərbində yerləşən Camburalia rayonundakı bir məbəddən olan üç rahib tərəfindən koordinasiya olunub. Qrupun digər üzvlərinin sosial şəbəkə vasitəsilə cəlb edildiyi qeyd olunur.