Epşteynə aid edilən prezidentlə bağlı məktub SAXTADIR

ABŞ Federal Təhqiqat Bürosu (FTB) və ABŞ Ədliyyə Nazirliyi maliyyəçi Ceffri Epşteynə aid edildiyi iddia olunan və adı açıqlanmayan bir prezidentin gənc qadınlara münasibətini təsvir edən məktubun saxta olduğunu rəsmi şəkildə təsdiqləyib.

Ajans.az xəbər verir ki, sözügedən sənəd Epşteynin istintaq materialları arasında aşkar edilib. Məktub ABŞ Gimnastika millisinin keçmiş həkimi Larri Nassara ünvanlanmış anonim qeyddə yer alıb. Qeyddə müəyyən bir prezidentin gənc qadınlara qarşı qeyri-etik davranışlar sərgilədiyi iddia olunurdu.

Rəsmi açıqlamada bildirilib ki, aparılan əl yazısı ekspertizası məktubun Epşteyn tərəfindən yazıldığını təsdiqləməyib. Bundan əlavə, sənəd Epşteynin Nyu-Yorkdakı həbsxana kamerasında huşsuz vəziyyətdə tapılmasından üç gün sonra Şimali Virciniya ştatından poçt vasitəsilə göndərilib.

Rəsmilər məktubun mənşəyi və məqsədi ilə bağlı araşdırmaların davam etdiyini bildiriblər.