Hitler Almaniyasına məxsus “qızıl qatar” tapıldı

Nasistlərə məxsus olduğu iddia edilən “qızıl qatar”ı axtaran bir qrup polşalı tədqiqatçı İkinci Dünya Müharibəsindən qalan əfsanəvi qatarın mövcudluğunu təsdiqləyə biləcək yeni məlumatlar əldə etdiklərini açıqlayıblar.

Ajans.az Dziennik.pl portalına istinadən xəbər verir ki, Aşağı Sileziya bölgəsində aparılan yerüstü radar araşdırması yeraltında anomaliya aşkar edib və qrup üzvləri bu anomaliyanı tunel və bir neçə vaqon kimi şərh ediblər.

Nəşrin məlumatına görə, tədqiqatçılardan biri belə deyib: “Biz kamuflyaj olunmuş dəmir yolu tunelini və onun içərisində üç vaqonu müəyyən etmişik. Sənədləşmə fizika, riyaziyyat və məntiq baxımından tamdır.”

Tədqiqat qrupu meşəlik ərazidə əlavə araşdırmalar aparmaq üçün rəsmi icazə almağı planlaşdırır.

Bununla belə, “qızıl qatar”ın kəşfi ilə bağlı hələlik rəsmi təsdiq yoxdur. Hesabatda qeyd olunur ki, mütəxəssislər radar məlumatlarının ilkin xarakter daşıdığını və mümkün qazıntılar da daxil olmaqla əlavə araşdırmalara ehtiyac olduğunu vurğulayırlar.

“Qızıl qatar” əfsanəsi nasistlərin müharibənin son aylarında Aşağı Sileziya bölgəsində qızıl, sənət əsərləri və digər qiymətli əşyalarla dolu bir qatarı gizlətmiş ola biləcəyi ehtimalına əsaslanır. Çoxsaylı axtarışlara baxmayaraq, qatarın mövcudluğunu təsdiqləyən heç bir sübut indiyədək tapılmayıb.