"Google" Almaniyada bulud infrastrukturuna 6,4 milyard dollar sərmayə qoyacaq

"Google" şirkəti qarşıdakı illərdə Almaniyaya 5,5 milyard avro (6,41 milyard dollar) sərmayə qoyacaq.

Ajans.az "Reuters" agentliyinə istinadən xəbər verir ki, şirkətin məqsədi Avropanın ən böyük iqtisadiyyatında infrastrukturunu və məlumat mərkəzi tutumunu genişləndirməkdir.

Plana Frankfurt yaxınlığındakı Ditzenbaxda yeni məlumat mərkəzinin tikilməsi, eləcə də Almaniyanın mərkəzi Hessen əyalətindəki Hanau şəhərindəki ərazisinin genişləndirilməsi daxildir. Bu barədə Google və dövlət rəsmiləri Berlində keçirilən mətbuat konfransında bildiriblər.

"Google Cloud" Şimali Avropa üzrə vitse-prezidenti Marianne Janik "Reuters" agentliyinə bildirib ki, 2026-2029-cu illərdə ediləcək investisiyaya Ditzenbax və Hanauda müvafiq olaraq 100 nəfər işləyəcək.

"Google"un Almaniyadakı rəhbəri Filipp Yustus bildirib ki, plan regionda ümumilikdə 9000 dolayı iş yeri təmin edəcək.