Tikiş fabrikində baş verən yanğında 16 nəfər həlak olub- Bu ölkədə...

Banqladeşin paytaxtı Dəkkənin Mirpur bölgəsində yerləşən tikiş fabrikində baş verən güclü yanğın nəticəsində azı 16 nəfər həyatını itirib.

Ajans.az Banqladeş Mühafizə Xidmətinə istinadən xəbər verir ki, 16 nəfərin cəsədi hadisə yerindən çıxarılıb, lakin meyitlər tanınmaz halda olduğundan DNT analizi vasitəsilə identifikasiya ediləcəklər.

Yanğın çərşənbə axşamı günorta saatlarında dörd mərtəbəli binada başlayıb və təxminən üç saat sonra nəzarət altına alınıb. Lakin bitişikdəki kimyəvi anbarın alovlanması davam edib, deyə rəsmi qurumlar bildiriblər.

Yanğının dəqiq hansı binada başlandığı hələlik müəyyən olunmayıb. Hadisə şahidlərinin sözlərinə görə, kimyəvi anbarda ağardıcı toz, plastik materiallar və hidrogen peroksid saxlanılırmış. Bu maddələr yanğının sürətlə yayılmasına və zəhərli qazların yaranmasına səbəb olub.

Yanğından Mühafizə Xidmətinin direktoru Mohammad Tajul Islam Chowdhury yerli mediaya bildirib ki, ölümlərin əksəriyyəti zəhərli qazların udulması və binanın dam qapısının bağlı olması səbəbindən baş verib:

“Qurbanların çoxu yüksək dərəcədə zəhərli qazı udduqdan dərhal sonra həyatını itirib.”

Rəsmilər bildiriblər ki, fabrikin və kimyəvi anbarın sahibləri hələ də tapılmayıb. Hazırda onların axtarışı və hadisə ilə bağlı istintaq tədbirləri davam etdirilir. Yanğından Mühafizə İdarəsinin məlumatına əsasən, kimyəvi anbarda nə yanğın təhlükəsizliyi sənədi, nə də fəaliyyət lisenziyası olub.

Şimal Dəkkə şəhər administrasiyası da təsdiqləyib ki, anbarın yaşayış və kommersiya məqsədilə istismarı üçün heç bir icazəsi olmayıb.

Hadisə zamanı onlarla ailə üzvü yanan binanın qarşısında toplaşıb, itkin düşmüş yaxınlarından xəbər almağa çalışıblar. Göz yaşları içində qızını axtaran bir ata Reuters xəbər agentliyinə deyib:

“Yanğın xəbərini eşidəndə dərhal buraya qaçdım. Amma hələ də onu tapa bilməmişəm. Mən sadəcə qızımı geri istəyirəm.”