Tramp və Kim Çen In arasında mümkün görüş gündəmdədir

ABŞ-ın prezidenti Donald Tramp ilə Şimali Koreya lideri Kim Çen In arasında yeni görüş baş tuta bilər. Mümkün görüşün oktyabrın sonunda Cənubi Koreyanın Kyoncu şəhərində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində keçirilməsi nəzərdə tutulur.

Ajans.az xəbər verir ki,bu barədə Cənubi Koreyanın birləşmə naziri Conq Donq-yeon parlament dinləmələri zamanı açıqlama verib. Onun sözlərinə görə, liderlərin görüşü Koreyalararası sərhəddə yerləşən Panmunjom kəndində keçirilə bilər.

“Açıq mənbələrdəki məlumatlar və onların təhlili göstərir ki, ABŞ və Şimali Koreya liderləri danışıqlara hazır görünür”, – deyə nazir bildirib.

Xatırladaq ki, Donald Tramp daha əvvəl Kim Çen Inla ilkin şərt olmadan danışıqlara hazır olduğunu bəyan etmişdi. ABŞ-ın sabiq prezidenti ilk prezidentlik müddəti dövründə Kim Çen Inla üç tarixi sammit keçirmiş və bu görüşlər Koreya yarımadasında gərginliyin azalmasına töhfə vermişdi.

Hazırda prezidentliyə namizəd olan Tramp oktyabrın sonunda Hind-Sakit Okean regionuna səfər planlaşdırır. Səfər çərçivəsində o, əvvəlcə Malayziyanın paytaxtı Kuala-Lumpurda Cənub-Şərqi Asiya Ölkələri Assosiasiyasının (ASEAN) sammitində iştirak edəcək, daha sonra Yaponiyanın paytaxtı Tokioda qısa dayanacaqdan sonra Cənubi Koreyanın Kyoncu şəhərinə yollanacaq.

Görüş baş tutacağı təqdirdə, bu, Tramp və Kim Çen In arasında dördüncü zirvə görüşü olacaq.