Nobel Mükafatı laureatı İsrail-HƏMAS razılaşmasından əvvəl seçilib

Norveçin Nobel Sülh Mükafatı Komitəsi laureatla bağlı qərarını oktyabrın 6-da keçirilən yekun iclasda qəbul edib. Bu isə o deməkdir ki, qalib, İsrail və Fələstin arasında HƏMAS hərəkatı ilə əldə olunmuş razılaşmadan xeyli əvvəl müəyyənləşdirilib.

Ajans.az xəbər verir ki,bu barədə Agence France-Presse məlumat yayıb.

Komitənin sözçüsü Erik Aasheim agentliyə bildirib ki, “yekun təfərrüatlar bazar ertəsi yekunlaşdırılıb” və oktyabrın 10-da elan ediləcək mükafatla bağlı əlavə iclasların keçirilməsi nəzərdə tutulmayıb.

Bu il Nobel Sülh Mükafatına 338 fiziki şəxs və təşkilat namizəd göstərilib. Lakin Nobel mükafatı üzrə ekspert Asle Sveen qeyd edib ki, İsrail və HƏMAS arasında əldə olunan son razılaşma 2025-ci ilin laureatının seçiminə “heç bir təsir göstərməyəcək”, çünki "komitə artıq qərarını verib".

Bundan əvvəl, oktyabrın 3-də Bloomberg xəbər vermişdi ki, ABŞ-ın keçmiş prezidenti Donald Trampın köməkçiləri — xüsusi elçi Stiv Vitkoff və senator Marko Rubio da daxil olmaqla — onun Nobel Sülh Mükafatı alması üçün həm açıq, həm də pərdəarxası lobbiçilik kampaniyası aparırlar. Norveçdə isə bu kampaniya narahatlıq doğurub. Belə ki, Tramp mükafata layiq görülmədiyi təqdirdə, onun mümkün sərt reaksiyası ilə bağlı narahatlıqlar var.

Qeyd edək ki, Tramp bir gün əvvəl — İsrail və HƏMAS nümayəndələrinin Misirdə keçirilən danışıqlardan sonra — sülh planının birinci mərhələsinə dair razılıq əldə olunduğunu bəyan etmişdi.