Paris muzeyindən 700 min dollar dəyərində qızıl oğurlanıb
Fransanın paytaxtı Parisdə yerləşən Milli Təbiət Tarixi Muzeyindən 700 min dollar dəyərində təmizlənməmiş qızıl nümunələri oğurlanıb.
Ajans.az xəbər verir ki,hadisə ötən çərşənbə axşamı muzeyin Geologiya və Mineralogiya Qalereyasında baş verib.
Muzey rəsmilərinin verdiyi məlumata görə, oğurluq hadisəsini ilk olaraq təhlükəsizlik işçiləri aşkar edərək dərhal hüquq-mühafizə orqanlarına məlumat veriblər. İlkin araşdırmalar göstərib ki, oğurluq “tam peşəkar bir komanda” tərəfindən həyata keçirilib və cinayətkarlar birbaşa qızıl nümunələrinin saxlandığı hissəni hədəf alıblar.
Muzeyin baş direktoru Emmanuel Skoulios açıqlamasında oğurlanan qızılın təxmini dəyərinin 700.000 dollar olduğunu təsdiqləyib. O, bu hadisənin yalnız maddi yox, həm də elmi və mədəni baxımdan böyük itki olduğunu vurğulayıb:
“Bu, təsadüfi bir oğurluq deyildi. Onlar hara və nə üçün gəldiklərini dəqiq bilirdilər. Bu qızıl nümunələri təkcə qiymətli metallardan ibarət deyil, həm də elmi araşdırmalar və tarixi irs üçün əvəzolunmaz materiallardır.”
Hazırda hadisə ilə bağlı istintaq davam edir. Muzey rəhbərliyi oğurluğun baş verdiyi qalereyada təhlükəsizlik tədbirlərinin gücləndirildiyini, lakin həmin bölmənin növbəti xəbərdarlığa qədər ictimaiyyət üçün bağlı qalacağını açıqlayıb.
Digər Xəbərlər
