TikTok gənc istifadəçilərə təsiri ilə bağlı narahatlıqları ortaya çıxarıb

TikTok-un hazırkı və keçmiş əməkdaşlarının iştirak etdiyi daxili video iclas şirkətin gənc istifadəçilərə təsiri ilə bağlı narahatlıqları ortaya çıxarıb. Video Şimali Karolina məhkəməsində sübut kimi təqdim olunub və bu həftə ictimaiyyətə açılıb.

Ajans.az CNN-ə istiandən xəbər verir ki,İclas zamanı işçilər TikTok-un populyar alqoritminin yeniyetmələrin psixi sağlamlığına mənfi təsir göstərə biləcəyini etiraf ediblər. Bu, şirkətin illərdir platformanı “gənclər üçün təhlükəsiz” kimi təqdim edən rəsmi açıqlamaları ilə ziddiyyət təşkil edir.

Keçmiş əməkdaşlardan Nicholas Chng bildirib:

“İnsanların maraqlı hesab etdikləri məzmun həmişə sağlam olmur. Təəssüf ki, platformanın dizaynına görə bu məzmunun yayılmasını təşviq edirik və bu məni narahat edir.”

Başqa bir kadrda TikTok-un hazırkı rəhbərlərindən Brett Peters platformanın məqsədini belə ifadə edib:

“İstəyirik ki, insanlar TikTok-dan heç vaxt ayrılmaq istəməsinlər.”

Məhkəmə sənədlərində qeyd olunur ki, şirkət valideynləri və uşaqları tətbiqin riskləri barədə tam məlumatlandırmayıb. Şimali Karolinanın baş prokuroru Jeff Jackson CNN-ə açıqlamasında deyib:

“Bu videolar sübut edir ki, sosial media şirkətləri uşaqları qazanclar naminə hətta sağlamlıqları bahasına olsa belə, bağlı saxlamağa çalışırlar.”

TikTok isə iddiaları “qeyri-dəqiq və aldadıcı” adlandıraraq rədd edib. Şirkət son illərdə gənclərin təhlükəsizliyi üçün əlavə funksiyalar – defolt məxfilik parametrləri, gecə bildirişlərinin söndürülməsi və “rəhbər meditasiya” kimi xüsusiyyətlər təqdim etdiyini bildirir.

Məhkəmə iddiası TikTok-un “aldadıcı təcrübələr” praktikasına son qoyulmasını və qeyri-müəyyən maliyyə cəzaları nəzərdə tutur.

Qeyd edək ki, video ABŞ-da tətbiqin gələcəyi ilə bağlı gərgin müzakirələrin fonunda yayımlanıb. Prezident Donald Tramp yaxın günlərdə TikTok-un qadağa və ya satışını nəzərdə tutan qanunun icrasını sentyabrın 17-nə qədər təxirə salıb.