Nigeriya hərbçiləri çoxsaylı quldar dəstə üzvünü məhv edib

Nigeriya Hərbi Hava Qüvvələri bazar ertəsi açıqlama verərək, şimal-qərbdə yerləşən Zamfara əyalətində fəaliyyət göstərən cinayətkar silahlı dəstələrin üzvlərinə qarşı uğurlu hava və quru əməliyyatları həyata keçirdiyini bildirib.

Ajans.az BBC-ə istinadən xəbər verir ki,Makakkari meşəsinə endirilən zərbələr zamanı, yerli “quldurlar” kimi tanınan 400-dən çox dəstə üzvü aşkarlanaraq zərərsizləşdirilib. Əməliyyat ərazisi, yüksək profilli adam oğurluqları ilə əlaqələndirilən silahlı şəxslərin sığınacağı kimi qiymətləndirilir.

Son iki həftə ərzində həmin dəstələr yaxın yaşayış məntəqələrinə hücum edərək çoxsaylı insanları qətlə yetirib və bir çoxunu oğurlayıb. Eyni zamanda, ən azı 13 təhlükəsizlik əməkdaşı da həlak olub.

Hərbi Hava Qüvvələrinin sözçüsü Ehimen Ejodame bildirib ki, ardıcıl hava zərbələri və yer əməliyyatları nəticəsində bir neçə məşhur quldur lideri və onların çoxsaylı silahlıları məhv edilib. Quru qüvvələri meşədən qaçmağa çalışanları da zərərsizləşdirib.

Nigeriyanın bəzi bölgələrində fidyə qarşılığında adam oğurluğu gəlirli cinayət fəaliyyəti olaraq qalır və bu quldar dəstələr 16 ildir silahlı üsyan aparan cihadçı qruplarla əməkdaşlıq edir.

Son illərdə ordu dəstələrə qarşı bir sıra əməliyyatlar keçirərək ən azı 95 üzvün məhv edilməsini təmin edib, lakin zorakılıq hələ də davam edir.