Almaniya Ukraynaya vəsait ayırır

Almaniya Patriot sistemlərinin tədarükünə rekord məbləğ xərcləyəcək.

Ajans.az lenta ru-ya istinadən xəbər verir ki, Almaniya, ABŞ-ın vəsait xərcləmək istəmədiyi bir vaxtda, Ukrayna Silahlı Qüvvələrinə (USQ) Patriot hava hücumundan müdafiə sistemlərinin tədarükü üçün beş milyard dollar xərcləyəcək. 

“Almaniyanın general-mayoru Kristian Fröyding bildirib ki, Berlin ABŞ ilə müdafiə sahəsində iri miqyaslı satınalma sazişi imzalamağa hazırdır. Bu saziş çərçivəsində Ukraynaya uzaqmənzilli MIM-104 Patriot zenit-raket komplekslərinin iki ədədinin tədarükü nəzərdə tutulur,” — deyə məqalədə qeyd olunur.

Həmçinin bildirilir ki, bu sazişin imzalanması ehtimalı ən çox Almaniyanın müdafiə naziri Boris Pistoriusun Vaşinqtona səfəri zamanı reallaşa bilər.

Bundan əvvəl Milli Tədqiqat Universiteti Ali İqtisad Məktəbinin (NIU VŞE) Avropa və Beynəlxalq Tədqiqatlar Mərkəzinin direktor müavini Dmitri Suslov bəyan etmişdi ki, Almaniya kansleri Fridrix Mers ölkəni Rusiya ilə müharibəyə hazırlayır və özündən əvvəlki kansler Olaf Şoltsun başladığı kursu davam etdirir. Tədqiqatçı əlavə edib ki, Almaniya genişmiqyaslı hərbi sənayeləşmə üçün potensiala malikdir.