Suriya: toqquşmalarda onlarla insan həlak olub

Cənubdakı Süveyda şəhərində Bədəvi sünni tayfaları ilə druz döyüşçüləri arasında baş verən toqquşmalarda onlarla insan həlak olub. Bu ərazidə aprel və may aylarında da ölümcül məzhəb zorakılığı qeydə alınmışdı.

Ajans.az dw.com-a istinadən xəbər verir ki,Cənubi Suriyada Bədəvi sünni tayfalarının üzvləri ilə druz icması arasında baş verən toqquşmalar nəticəsində azı 37 nəfər həlak olub. Suriyada İnsan Hüquqlarının Müşahidəsi Təşkilatı (SOHR) bildirib ki, ölənlər əsasən druzların yaşadığı Süveyda şəhərindəki döyüşlərdə həyatını itirib.

SOHR-un məlumatına görə, ölənlərin 27-si druzdur, onlardan ikisi uşaqdır, 10 nəfər isə Bədəvidir. Təxminən 50 nəfər isə yaralanıb.

Bu döyüşlər, aprel ayının sonu və mayın əvvəlində druz icması ilə Suriya təhlükəsizlik qüvvələri arasında baş verən və onlarla insanın ölümünə səbəb olan qarşıdurmalardan sonra bölgədə baş verən ilk ölümcül zorakılıq dalğasıdır.