Tramp-dan xəbərdarlıq

ABŞ prezidenti xəbərdarlıq edib ki, 9 iyuldan sonra tariflər 1 avqustdan yenidən yüksək səviyyəyə qalxacaq.

Ajans.az euronews-a istinadən xəbər verir ki,  Tramp administrasiyası ticarət tərəfdaşlarına təzyiqi artırır və çərşənbə günü başa çatacaq 90 günlük ticarət tarifləri müddətindən əvvəl yeni razılaşmalar bağlamağa çağırır.

ABŞ planlaşdırır ki, bazar ertəsindən etibarən ölkələrə məktublar göndərilsin və bu məktublarda tariflərin 1 avqustdan etibarən artırıla biləcəyi barədə xəbərdarlıq yer alsın.

Bu isə şirkətlər, istehlakçılar və ABŞ-ın ticarət tərəfdaşları üçün əlavə qeyri-müəyyənlik yaradır. Hələ də bəlli deyil ki, hansı ölkələrə bu məktublar göndəriləcək, yaxın günlərdə nə dəyişəcək və Prezident Donald Tramp tarifləri tətbiq etməyi bir daha təxirə salacaqmı. Tramp və onun baş məsləhətçiləri danışıqlar üçün vaxtın uzadıla biləcəyini desələr də, administrasiya digər ölkələrə maksimum təzyiq göstərildiyini vurğulayır.

Ağ Evin Milli İqtisadi Şurasının direktoru Kevin Hassett CBS kanalına verdiyi açıqlamada bildirib: “ABŞ hər zaman hər kəslə hər şeyi danışmağa hazırdır. Bəzi son tarixlər var və müəyyən məsələlər yaxınlaşıb. Ola bilər ki, bu tarixdən kənara çıxılsın, ola da bilər ki, çıxılmasın. Sonda qərarı prezident verəcək.”

Eyni zamanda, Ağ Evin İqtisadi Məsləhətçilər Şurasının sədri Stiven Miran qeyd edib ki, səmimi şəkildə danışıqlar aparan və güzəştə gedən ölkələr üçün “tarix bir qədər təxirə salına bilər”