Aİ üçüncü dünya ölkələrində USAID-i ƏVƏZ EDİR - Kallas

Avropa İttifaqı üçüncü dünya ölkələrində ABŞ-nin Beynəlxalq İnkişaf Agentliyinin (USAİD) ən azı qismən ələ keçirilməsi imkanlarını müzakirə edir və diqqəti “demokratiyanın təşviqi” layihələrinə yönəldir.

Ajans.az xəbər verir ki, bunu Aİ İnkişaf Şurasının iclasına gələrkən Avropa diplomatiyasının rəhbəri Kaja Kallas deyib.

"Nazirlər USAID-in inkişafa yardım layihələrindən çıxmasının nəticələrini və Aİ-nin hara daxil ola biləcəyini müzakirə edəcəklər", - Aİ rəsmisi bildirib.

O, Brüsselin Vaşinqtonun buraxdığı boşluğu doldura bilməyəcəyini, lakin Aİ-nin diqqətini Avropa prioritetlərinə - demokratiya, media azadlığı və insan haqlarına yönəldəcəyini bildirib.

Qeyd edək ki, fevralın 7-də Ağ Ev “rəngli inqilablar agentliyi” də adlandırılan USAİD-in çox milyard dollarlıq xərcləmələri ilə bağlı yeni məlumatları açıqlayıb. Agentlik demokratlar haqqında gözəl imic yaratmaq üçün Amerika mətbuatına pul ödəyib. ABŞ Prezidenti Donald Tramp özünün sosial media hesabında bunu “ən böyük qalmaqal” adlandırıb və Demokratlar Partiyası heç vaxt bundan təmizlənə bilməyəcək.

Xatırladaq ki, Tramp yanvarın 24-də xaricə yardıma yenidən baxılması ilə bağlı sərəncam verib. Ukraynaya dəstək məqsədi daşıyan layihələr də dondurulub. Bunun ardınca USAID müvafiq proqramların əksəriyyətinin maliyyələşdirilməsini dayandırıb.