Papa Fransiskin tabutu ictimaiyyətə nümayiş üçün oraya KÖÇÜRÜLDÜ

Romada Papa Fransiskin cənazəsinin olduğu tabut xalqın vidalaşması üçün Müqəddəs Pyotr Bazilikasına aparılıb. 

Ajans.az xəbər verir ki, bu barədə Associated Press məlumat yayıb.

Məqalədə deyilir:

"Katolik kardinalları Papa Fransiskin cəsədini Müqəddəs Pyotr Bazilikasına köçürmək üçün ritual mərasim keçiriblər. Onun qalıqları katolik dindarlarının Argentina pontifisinə ehtiramlarını bildirmələri üçün burada nümayiş etdiriləcək".

Bundan əlavə, nəşr aydınlaşdırıb ki, Roma Katolik Kilsəsinin başçısının cənazəsi xalqla vidalaşmaq üçün təhvil verildikdən sonra dindarların ona yas tutması üçün bazilika çərşənbə və cümə axşamı gecə yarısına qədər açıq olacaq. İctimai matəm müddətinin aprelin 25-i cümə günü yerli vaxtla saat 19:00-da başa çatacağı vurğulanıb.

Papa Fransiskin dəfn mərasimi şənbə günü saat 10:00-da Müqəddəs Pyotr meydanında keçiriləcək. Pontifik, vəsiyyətinə görə, Vatikandan kənarda, ən çox sevdiyi Məryəm ikonasının saxlandığı Santa Maria Maggiore Bazilikasında dəfn ediləcək.