Azərbaycan elm və ədəbiyyatının dahi siması: Kamal Abdulla 74 yaşını tamam edir!
Bu gün Azərbaycanın və dünya elmi-ədəbi ictimaiyyətinin görkəmli nümayəndəsi, Xalq yazıçısı, akademik Kamal Abdullanın 74 yaşı tamam olur. Onun zəngin elmi və ədəbi irsi, ölkəmizin intellektual inkişafına verdiyi misilsiz töhfələr onu müasir ictimai fikrin öncül simalarından birinə çevirib.
Milli Elmlər Akademiyasının həqiqi üzvü, Əməkdar elm xadimi, Azərbaycan Dillər Universitetinin rektoru, filologiya elmləri doktoru, professor Kamal Abdulla çağdaş Azərbaycan elminin və ədəbiyyatının inkişafında müstəsna xidmətlər göstərmişdir. Son 40 ildə ölkənin elmi, ədəbi-mədəni və ictimai həyatında onun təşəbbüsləri və təşkilatçılığı ilə həyata keçirilən mühüm tədbirlər xüsusi yer tutur.
Kamal Abdulla Azərbaycanın dünya miqyasında tanınması və inteqrasiyası üçün də yorulmadan çalışmışdır. Onun təşəbbüsü ilə qurulan beynəlxalq əlaqələr, elmi simpoziumlar və mədəni layihələr ölkəmizin elm və mədəniyyət sahələrində mövqeyini möhkəmləndirmişdir.
Kamal Abdullanın çoxşaxəli fəaliyyəti Azərbaycan dövləti tərəfindən yüksək qiymətləndirilmişdir. O, "Şöhrət" və "Şərəf" ordenləri, həmçinin dünya miqyasında təsis edilmiş nüfuzlu mükafatlarla təltif olunmuşdur.
Ajans.az kollektivi və ADU Tələbə Həmkarlar İttifaqı Komitəsi Akademik Kamal Abdullanı 74 yaşının tamam olması münasibətilə təbrik edir, ona möhkəm can sağlığı, uzun ömür və gələcək fəaliyyətində yeni uğurlar arzulayırıq! Onun zəngin irsi ölkəmizin elm və ədəbiyyat sahəsində əsrlər boyu işıq saçacaq.
