Sərhəddə silahlar susmur - İrəvan Bakını buna vadar etmək istəyir
“Ermənistanın sərhəddə təxribatlara əl atmasının iki səbəbi var. Birinci səbəb odur ki, yarım ay öncə tərəflər sülh danışıqları mətninin razılaşdırıldığını bəyan etdilər. Ermənistan bu sənədə imza atmaq istəyir, lakin Azərbaycanın yarımçıq sənədə imza atmaq niyyəti yoxdur. Ona görə ki, Azərbaycan sülhün dayanıqlı olması üçün bəzi məsələlərin həll olunmasını istəyir. Bunların arasında Ermənistan konstitusiyasında dəyişikliyin edilməsi, ATƏT-in Minsk qruöunun buraxılması və s. məsələlər var”.
Bunu Ajans.az-a açıqlamasında politoloq Oqtay Qasımov deyib. Onun sözlərinə görə, Ermənistan prosesləri ləngitməklə məşğuldur:
“Sülhdən danışmaqla bərabər silahlanmağa davam edir. Ermənistan bu təxribatları törətməklə Ukrayna, Rusiya və Yaxın Şərqdəki savaşlar səbəbindən arxa planda qalan Cənubi Qafqazdakı məsələləri gündəmə gətirmək istəyir. Bu addımlar Azərbaycanı cavab tədbirləri görməyə vadar etmək, beynəlxalq ictimaiyyətin diqqətini Cənubi Qafqaza yönəltmək, Azərbaycana qarşı təzyiqlərin artırılması nəticəsində yarımçıq sənədə imza atdırmaq məqsədi daşıyır”.
Politoloq qeyd edib ki, Ermənistan uyğun məqam yetişəndə revanş almaq və müəyyən əraziləri işğal etmək niyyətindədir:
“Son günlərdəki təxribat və dron kəşfiyyatları da ona görədir ki, şərti sərhədə yaxın Azərbaycan qüvvələrinin mövqelərini müəyyənləşdirsinlər və müharibə olacağı halda həmin mövqelərə atəş açsınlar. Azərbaycan bundan xəbərdardır və hazırlıqlıdır”.
© Materiallardan istifadə edərkən hiperlinklə istinad olunmalıdır.
