Türkiyədə inflyasiya azalmaqa DAVAM EDİR: Ərzaq qiymətləri bahalaşıb

Türkiyədə istehlak qiymətlərinin illik artım tempi yanvar ayında ardıcıl dördüncü dəfə zəifləyərək 2021-ci ilin noyabrından bəri ən aşağı səviyyəyə enib. Bununla belə, ərzaq və bəzi digər məhsullar üzrə mövsümi bahalaşma inflyasiyanı ekspert proqnozlarından bir qədər yüksək saxlayıb.

Ajans.az Türkiyə Statistika İdarəsinə (TÜİK) istinadən xəbər verir ki, yanvar ayında illik inflyasiya dekabr ayındakı 30,89 faizdən 30,65 faizə düşüb. Trading Economics analitikləri isə bu göstəricinin 30 faizə qədər enəcəyini proqnozlaşdırırdılar.

Yanvar ayında kommunal xidmətlər üzrə illik qiymət artımı 49,45 faizdən 45,36 faizə, mebel və məişət əşyaları üzrə 24,97 faizdən 23,13 faizə, otel, kafe və restoran xidmətləri üzrə isə 34,11 faizdən 33,31 faizə enib. Bununla yanaşı, ərzaq və alkoqolsuz içkilərin qiymət artımı 28,31 faizdən 31,69 faizə, nəqliyyat xidmətləri üzrə 28,44 faizdən 29,39 faizə, spirtli içkilər və tütün məhsulları üzrə isə 30,8 faizdən 31,45 faizə yüksəlib.

Aylıq inflyasiya isə yanvar ayında kəskin artaraq dekabr ayındakı 0,89 faizdən 4,84 faizə çatıb ki, bu da ilin ən yüksək aylıq göstəricisi olub. Ay ərzində ərzaq qiymətləri 6,59 faiz, nəqliyyat xidmətləri 5,29 faiz, kommunal xidmətlər isə 4,43 faiz bahalaşıb.

TÜİK-in məlumatına əsasən, istehsalçı qiymətləri indeksi (ÜQİ) yanvar ayında illik müqayisədə 27,17 faiz, aylıq müqayisədə isə 2,67 faiz artıb. Dekabr ayında bu göstəricilər müvafiq olaraq 27,67 faiz və 0,75 faiz təşkil etmişdi.

Qeyd edək ki, Türkiyə Mərkəzi Bankı yanvar ayında əsas faiz dərəcəsini 100 baza bəndi azaldaraq illik 37 faizə endirib. Bu göstərici 2023-cü ilin noyabrından bəri ən aşağı səviyyədir. Ötən ilin əvvəlində əsas faiz dərəcəsi 47,5 faiz olub.