Tacikistan Rusiya səfirindən izahat tələb etdi

Tacikistan Xarici İşlər Nazirliyi Moskva yaxınlığındakı Qorki-2 kəndindəki məktəbdə dördüncü sinif şagirdi Kobiljon Əliyevin qətlini qətiyyətlə pisləyib.

Ajans.az Nazirliyə istinadən xəbər verir ki, uşağa hücum etnik nifrət zəminində törədilib.

Hadisə ilə bağlı Tacikistan Xarici İşlər Nazirliyinə Rusiya səfiri Semyon Qriqoryev çağırılıb. Səfirə Rusiya tərəfindən bu faciəli hadisənin dərhal, obyektiv və qərəzsiz araşdırılması və bütün iştirakçıların qanunun bütün sərtliyi ilə məsuliyyətə cəlb edilməsi tələb olunan nota təqdim edilib.

Bundan əlavə, Nazirlik bildirib ki, Tacikistan Respublikasının Rusiya Federasiyasındakı səfirliyinə mərhumun ailəsi və dostları ilə daim əlaqə saxlamaq və məsələnin nəzarətdə saxlanılması tapşırılıb.