Xameneinin müşavirinin qızının gəlinlik paltarı tənqid edilib

Almaniyanın Frankfurter Allgemeine Zeitung (F.A.Z.) qəzeti İran Ali Liderinin müşaviri Əli Şamxaninin qızının toyunu “Xameneinin müşavirinin qızının açıq-aşkar gəlinlik paltarı və mollaların ikili standartları” başlığı altında işıqlandırıb.

Ajans.az xəbər verir ki,bu barədə “Azad İran” Telegram kanalı məlumat yayıb.

Qəzetin məlumatına görə, Şamxaninin qızının gəlinlik paltarı məşhur bir İspan brendi tərəfindən dizayn edilib və toy üç ayrı salonda eyni vaxtda keçirilib, xərci isə təxminən 2 milyon avro olub. Təkcə gəlinlik paltarının qiyməti 35–55 min avro civarındadır.

F.A.Z. vurğulayıb ki, gəlinin müasir geyim seçimi və dini adının dəyişdirilməsi İranda mövcud dini normalara uyğun deyil və toy ölkədəki dini və sosial ikili standartları göz önünə çıxarır.