Hepatit B üçün dünyada ilk test hazırlanıb

Rospotrebnadzor Mərkəzi Elmi-Tədqiqat Epidemiologiya İnstitutunun alimləri hepatit B-nin diaqnostikası üçün dünyada ilk sürətli test hazırlayıblar. Yeni test loop vasitəçiliyi ilə izotermik gücləndirmə (LAMP) üsulu əsasında yaradılıb və artıq rəsmi şəkildə qeydiyyatdan keçirilib.

Ajans.az xəbər verir ki,bu barədə Rospotrebnadzorun mətbuat xidməti məlumat verib.

Məlumata görə, testin həssaslığı polimeraz zəncirvari reaksiya (PCR) ilə müqayisə oluna bilər, lakin nəticəni cəmi 25–30 dəqiqə ərzində müəyyən etməyə imkan verir.

Yeni üsul hepatit B virusunun sürətli və dəqiq aşkarlanmasına, xəstələrin vaxtında müəyyən edilməsinə, müalicənin başlanmasına və epidemiya əleyhinə tədbirlərin daha operativ həyata keçirilməsinə şərait yaradır.

Qeyd edək ki, hepatit B qaraciyərin ciddi zədələnməsinə — o cümlədən siroz və xərçəngə — səbəb ola bilən yoluxucu xəstəlikdir. İnfeksiya qan və digər bioloji mayelər vasitəsilə ötürülür, xüsusilə uşaqlar və immuniteti zəif olan şəxslər risk qrupuna daxildir.