Suriyada Müdafiə Nazirliyinin avtobusunda partlayış

Suriyanın şərqində Suriya Müdafiə Nazirliyinə məxsus avtobusda baş verən partlayış nəticəsində azı 4 əsgər həlak olub, bir neçəsi isə yaralanıb.

Ajans.az xəbər verir ki,bu barədə ölkənin neft naziri Məhəmməd əl-Bəşir sosial media platforması X-də məlumat verib.

Nazirin sözlərinə görə, əsgərlər neft obyektini mühafizə etmək üçün işə gedərkən hadisə baş verib.

Partlayış Deyr əz-Zor və Mayadin şəhərlərini birləşdirən yolda qeydə alınıb. Dövlətə məxsus “Əl-İxbariya” telekanalı insidentin cümə axşamı günü baş verdiyini təsdiqləyib.

Böyük Britaniyada yerləşən Suriya İnsan Haqları Müşahidə Qrupu isə hücum nəticəsində 3 əsgərin öldüyünü, 9 əsgərin isə yaralandığını bildirib.

Hazırda partlayışın kim tərəfindən törədildiyi bilinmir. Hadisə ilə bağlı heç bir silahlı qrup məsuliyyəti üzərinə götürməyib.

Suriya hökuməti və yerli təhlükəsizlik orqanları insidentlə bağlı araşdırma aparır.