Bu ölkənin başçısı istefa verdi

Lüksemburqun Böyük Hersoqu Henri cümə günü rəsmi olaraq taxtdan imtina edərək, oğlu Gilyomun (Guillaume) xeyrinə hakimiyyətə son qoydu.

Ajans.az xəbər verir ki,bu barədə “Associated Press” məlumat yayıb.

70 yaşlı Henri 25 il ərzində Avropanın mərkəzində yerləşən bu kiçik konstitusiyalı monarxiyanı təmsil edərək əsasən simvolik rolu icra edib. Onun 43 yaşlı oğlu Gilyom bu gündən etibarən Lüksemburqun yeni Böyük Hersoqu olacaq.

Taxtın təhvil verilməsi mərasimi Böyük Hersoqun rəsmi iqamətgahı olan, sarı daşdan tikilmiş və qüllələrlə bəzədilmiş tarixi sarayda keçirilib. Yeni hersoq Gilyom yaxın saatlarda tac taxaraq Deputatlar Palatasının – Lüksemburqun 60 nəfərlik parlamentinin üzvləri qarşısında ölkə Konstitusiyasına and içəcək.

Yeni Böyük Hersoq daha sonra həyat yoldaşı, Belçika əsilli qrafinya Stefani de Lannoy, beş yaşlı oğlu şahzadə Çarlz və iki yaşlı oğlu şahzadə Fransua ilə birlikdə sarayın eyvanından xalqı salamlayacaq.

Mərasimlərdə Belçika və Hollandiya kral ailələrinin nümayəndələrinin iştirakı gözlənilir.

Cümə axşamı Böyük Hersoq Gilyomun şərəfinə Fransa Prezidenti Emmanuel Makron və Almaniya Prezidenti Frank-Valter Ştaynmayer də daxil olmaqla yüksək səviyyəli qonaqların qatılacağı qala gecəsi keçiriləcək.

Həftə sonu isə yeni Böyük Hersoq ölkə üzrə ənənəvi turuna başlayacaq. Rəsmi tədbirlər bazar günü Lüksemburqun Notr-Dam Katolik Katedralində arxiyepiskop Jan-Klod Holleriçin rəhbərliyi ilə keçiriləcək dini mərasimlə başa çatacaq.