Pakistanın şərqində kütləvi evakuasiya

Pakistanın şərqində on minlərlə insan Hindistanın daşan çaylardan və bəndlərdən suları sərhəd bölgələrinə buraxmasından sonra təhlükəsiz ərazilərə təxliyə edilib.

Ajans.az Associated Press-ə istinadən xəbər verir ki, bu addım Nyu-Dehlinin İslamabadı mümkün transsərhəd daşqınlar barədə xəbərdar etməsindən bir gün sonra atılıb. Bu, iki nüvə silahlı qonşu arasında aylar ərzində ilk ictimai diplomatik təmas kimi dəyərləndirilir.

Pakistan Milli Fəlakətlərin İdarə Olunması İdarəsinin (NDMA) açıqlamasına görə, Sutlej çayında suyun səviyyəsinin artacağı barədə əvvəlcədən xəbərdarlıq olunub. Təxliyə əməliyyatları Pəncab əyalətinin bir sıra rayonlarında davam etdirilir.

Məlumata görə, xilasedicilər Pəncabın Kasur rayonundan 14 min nəfəri, sərhəd yaxınlığındakı Bahavalnaqar şəhərindən isə 89 min nəfəri köçürüblər.

NDMA əhalini çaylardan və alçaq ərazilərdən uzaq durmağa, lazımsız səyahətlərdən çəkinməyə və xəbərdarlıq siqnallarına əməl etməyə çağırıb.

Pakistan və Hindistanı vurmağa davam edən güclü musson yağışları ölkədə humanitar böhranı dərinləşdirib. Rəsmilərin məlumatına görə, iyunun 26-dan bəri daşqınlar nəticəsində Pakistanda 800-dən çox insan həlak olub.

Kəşmirdə isə azı 65 nəfər ölüb, yüzlərlə insan Hindistanın nəzarətində olan Cammu bölgəsində evlərini tərk etməyə məcbur qalıb.

Xatırladaq ki, 2014-cü ildə Kəşmirdə son yüzilliyin ən dağıdıcı musson daşqınları baş verib və 500 nəfər həyatını itirib.

Son xəbərdarlıq, Hindistanın apreldə Kəşmirdə 26 turistin ölümü ilə bağlı Dünya Bankının vasitəçiliyi ilə yaradılmış Hind Suları Komissiyasını dayandırmasından sonra birbaşa diplomatik kanallarla Pakistana ötürülüb.

İslamabad hesab edir ki, Nyu-Dehli birtərəfli qaydada 1960-cı il Hind Suları Müqaviləsini poza bilməz. Müqavilə indiyədək iki müharibə (1965 və 1971) və 1999-cu il sərhəd toqquşmalarına baxmayaraq qüvvədə qalıb.

Mütəxəssislər son illərdə bölgədə yağışların intensivləşməsini iqlim dəyişikliyi ilə əlaqələndirirlər. 2022-ci ildəki daşqınlarda ölkənin üçdə biri su altında qalmış, 1700-dən çox insan həyatını itirmişdi.

Sinoptiklərin proqnozuna görə, yağışlar bu həftənin ortalarına qədər davam edəcək.