Meta süni intellektin uşaqlarla “şəhvətli söhbətlərinə” görə araşdırılır

ABŞ-da senator Josh Hawley sosial şəbəkə nəhəngi Meta-ya qarşı araşdırma başladıb. Səbəb şirkətin daxili sənədlərində süni intellekt chatbotlarının azyaşlılarla “şəhvətli” və “romantik” söhbətlərə icazə verildiyini göstərən qeydlərin üzə çıxmasıdır.

Ajans.az Reuters-ə istinadən xəbər verir ki,“GenAI: Məzmun Risk Standartları” adlanan sənəddə Meta-nın generativ süni intellektinin yaratdığı potensial risklər əks olunub.

Respublikaçı senator Hawley sənədi “töhmətləndirici və iyrənc” adlandırıb və Meta-dan məsələ ilə bağlı ətraflı hesabat tələb edib. O, X sosial şəbəkəsində yazıb: “İndi öyrəndik ki, Meta-nın chatbotları 8 yaşlı uşaqlarla açıq və ‘şəhvətli’ söhbətlər aparmaq üçün proqramlaşdırılıb. Bu, xəstədir. Cavab almaq üçün tam araşdırmaya başlayıram. Big Tech: uşaqlarımızı rahat buraxın.”

Meta isə iddiaları təkzib edərək bildirib ki, sözügedən nümunələr “səhv” idi, şirkətin siyasətinə uyğun gəlmir və artıq silinib. Şirkət sözçüsü deyib: “Bizim açıq siyasətimiz var: uşaqları seksuallaşdıran məzmun və böyüklərlə azyaşlılar arasında seksual rol oyunu qəti şəkildə qadağandır.”

Daxili sənəddə həmçinin Meta-nın chatbotlarının yanlış tibbi məlumat verə bilməsi, irq, cinsiyyət və məşhurlar barədə təxribat xarakterli cavablar təqdim etməsi risklərinin də qeyd olunduğu bildirilir.

Senator Hawley Meta rəhbəri Mark Zukerberqə ünvanladığı məktubda yazıb: “Valideynlər həqiqətə, uşaqlar isə müdafiəyə layiqdirlər.”

Reuters-in məlumatına görə, sənəddə Meta AI-nin məşhurlar barədə yalan məlumat yaymasına da icazə verildiyi qeyd olunub – yalnız təqdim olunan cavabın düzgün olmadığı barədə xəbərdarlıq əlavə olunması şərti ilə.

Meta-ya məxsus platformalara Facebook, Instagram və WhatsApp daxildir.