850 tısbağanı corabda göndərən şəxsə həbs cəzası veriblər

Çin vətəndaşı Wei Qiang Lin qorunan növlərə aid 850-yə yaxın tısbağanı corablara bükərək və saxta şəkildə “oyuncaq” kimi etiketləyərək Honq-Konqa göndərməkdə günahını etiraf edib.

Ajans.az BBC-ə istinadən xəbər verir ki, Lin 2023-cü ilin avqustundan 2024-cü ilin noyabrına qədər tısbağalarla dolu 200-dən çox bağlamanı Honq-Konqa ixrac edib. Qutuların üzərində “plastik heyvan oyuncaqları” kimi yanlış etiketlər yapışdırılıb.

Lin əsasən şərq qutusu tısbağası və üçbarmaqlı qutubaşı tısbağaları göndərirdi. ABŞ-da yaşayan hər iki növ ev heyvanı bazarında yüksək qiymətləndirilir və Çində status simvolu hesab olunur. Onların qabıqlarında bənzərsiz işarələr olur.

ABŞ rəsmiləri Lin tərəfindən göndərilən tısbağaların bazar dəyərini 1,4 milyon dollar olaraq qiymətləndirib. O, sərhəd yoxlaması zamanı saxlanılıb. Hər iki növ Nəsli kəsilməkdə olan növlərin beynəlxalq ticarətini tənzimləyən CITES konvensiyası ilə qorunur və yalnız xüsusi icazə ilə satıla bilər.

Bundan əlavə, Lin zəhərli ilanlar da daxil olmaqla sürünənlərlə dolu 11 bağlamanı da göndərib. Dekabrın 23-də məhkəmə hökmü elan ediləcək və onu 5 ilədək həbs cəzası gözləyir.

Mart ayında digər bir Çin vətəndaşı 2000-dən çox şərq qutusu tısbağasını corablara bükərək qaçaqmalçılıq etdiyi üçün 30 ay həbs cəzasına məhkum edilib. O zaman qutuların üzərində badam və şokoladlı peçenye olduğu qeyd edilmişdi. ABŞ rəsmiləri hər tısbağanın təxminən 2000 dollara satıla biləcəyini bildirmişdi.