Galibaf: İslam ölkələrini parçalamaq istəyirlər

İran İslami Şura Məclisi Sədri Məhəmməd Bəqir Qalibaf İsveçrənin Cenevrə şəhərində keçirilən 6-cı Dünya Parlament Rəhbərləri Zirvəsinin fasilələrində Pakistan Milli Məclisinin Sədri Ayaz Sadiq ilə görüşüb

Ajans.az xəbər verir ki, Məclis sədri Qalibaf görüşdə dost və qardaş ölkə Pakistanın sionist rejim və ABŞ-ın son hücumlarına qarşı mövqeyinə və eləcə də İran ilə bütün sahələrdə əməkdaşlığa görə təşəkkür edərək bildirib:

“Baş verən hücumda ölkəmizin bir neçə komandiri sui-qəsdə məruz qaldı. Sionistlərin hərbi əməliyyatları birbaşa ABŞ-ın dəstəyi ilə həyata keçirilir, lakin İran onlara qəti və sərt cavab verdi.”

Qalibaf sionist rejimin İslam ölkələrinə qarşı hücumlarının davam edəcəyini vurğulayaraq əlavə edib:

“Onlar İslam ölkələrini parçalamaq niyyətindədirlər; buna görə onlara qarşı ciddi şəkildə durmaq lazımdır.”

O, İslam ölkələri arasında həmrəylik və əməkdaşlıq qurulmasının vacibliyini qeyd edərək dedi:

“Bu ölkələr Qəzza və Fələstin vəziyyətinin daha da pisləşməsinin qarşısını almalıdırlar; əks halda Suriyada baş verənlər ardıcıl olaraq digər ölkələrdə də təkrarlanacaq.”

Məclis sədri, İranın verdiyi sərt cavabın sionistlərin əslində müdafiəsiz və məğlubiyyətə açıq olduqlarını göstərdiyini bildirərək əlavə edib:

“Bu hərəkət İslam ümmətinə yeni ruh verdi və onları gələcəyə dair ümidlərlə doldurdu.”