Bütün dünyanı TƏHLÜKƏ GÖZLƏYİR - Neft 100 dolları KEÇƏCƏK

ABŞ-nin İranda üç nüvə obyektinə Tomaqavk raketləri ilə hücumundan sonra İran parlamenti Hörmüz boğazının bağlanmasını təsdiqləyib.

Ajans.az xəbər verir ki, bu gərginlik dünya enerji bazarlarında ciddi dalğalanmalara səbəb olub.

Brent nefti 5 ayın zirvəsində

Cümə günü 77,17 dollardan bağlanan Brent markalı neftin bir bareli həftənin ilk əməliyyatlarında 80,34 dollara yüksəlib. Sonradan qiymət 79 dollar civarında balans axtarışına girib. Bu, yanvarın 21-dən bəri ilk dəfə Brent-in 80-dollar həddini keçməsi ilə nəticələnib.

Dünya neft tədarükünün 20%-nin keçdiyi Hörmüz boğazının bağlanması ehtimalı neft bazarlarında təşviş yaradıb. İranın cavab addımları ilə bağlı qeyri-müəyyənlik də gərginliyi artırır. Nəticədə enerji qiymətlərində kəskin artım müşahidə olunur.

Goldman Sachs-dan xəbərdarlıq

Goldman Sachs bildirib ki, Hörmüz boğazı bir ay bağlı qalsa, Brent neftinin qiyməti 110 dollar səviyyəsinə çata bilər. Hətta gündəlik 1,75 milyon barellik azalma belə qiymətləri 90 dollara qaldıra bilər.

Hörmüz boğazının əhəmiyyəti

Bu dar su keçidi Yaxın Şərqdə hasil olunan neft və qazın Hind okeanı vasitəsilə dünya bazarlarına çıxışı üçün əsas arteriyadır. Gündəlik 20 milyon barel neft və LNG bu boğazdan keçərək əsasən Asiya ölkələrinə, xüsusilə də Çinə çatdırılır.

Son söz hələ deyilməyib

İran parlamenti boğazın bağlanmasını təsdiqləsə də, yekun qərar Ali Milli Təhlükəsizlik Şurasına məxsusdur. Hələlik tam bağlanma qərarı verilməyib, lakin risk yüksək olaraq qalır.