Əraqçi Moskva və Tehranın mövqelərinin razılaşdırıldığını AÇIQLADI

Tehran Moskvanın Yaxın Şərqdəki gərginliyi pisləyən bəyanatlarını yüksək qiymətləndirir.

Ajans.az xəbər verir ki, bu barədə İranın xarici işlər naziri Abbas Əraqçi öz “Telegram” kanalında bildirib.

İran diplomatiyasının rəhbərinin sözlərinə görə, Moskva və Tehran həmişə öz mövqelərini koordinasiya edərək işləmiş və ünsiyyətdə olmuşlar.

Bundan əlavə, İran Xarici İşlər Nazirliyinin rəhbəri bildirib ki, bazar ertəsi, iyunun 23-də o, Vladimir Putinlə Yaxın Şərqdəki təhdidlərlə, o cümlədən İsrail və ABŞ-nin İrana hücumu ilə bağlı məsələləri müzakirə etməyi gözləyir.

“Bizim və Rusiyanın ümumi narahatlıqları və opponentləri var”, - deyə siyasətçi xatırladıb.

Bir gün əvvəl İranın xarici işlər naziri Abbas Əraqçi Moskvaya gəlib. Rusiya paytaxtında o, Rusiya prezidenti Vladimir Putin və Rusiyanın digər yüksək rütbəli rəsmiləri ilə danışıqlar aparacaq.

Bundan əvvəl Rusiya lideri bildirib ki, Moskva İranın qanuni hüquqlarını, o cümlədən nüvə enerjisindən dinc məqsədlərlə istifadə ilə bağlı məsələləri müdafiə etməkdə dəstəkləyir. Prezident vurğulayıb ki, Rusiyanın İran və onun qanuni hüquq və maraqları ilə bağlı mövqeyi dəyişməz olaraq qalır.

Rusiya Xarici İşlər Nazirliyi İsrailin İslam Respublikası ərazisinə hücumlarından sonra iyunun 22-də səhər saatlarında ABŞ-nin İranın nüvə obyektlərinə aviazərbələr endirməsini kəskin pisləyib. Nazirlik qeyd edib ki, bu cür hərəkətlər beynəlxalq normaları kobud şəkildə pozur, regional və qlobal sabitlik üçün ciddi risklər yaradır.