Hacı Qalib Fərhad Əhmədovun 1 milyon dollarını hara xərcləyib?
Azərbaycanlı milyarder Fərhad Əhmədovun sabiq deputat Hacı Qalib Salahzadəyə verdiyi 1 milyon dollar ölkə gündəmini silkələməyə davam edir.
Ajans.az Musavat.com-a istinadən xəbər verir ki, Hacı Qalibin özünün etirafına görə, bu məbləği nəğd şəkildə alıb və həmin pulun 300 min dollarını yüzdən çox vətəndaşın Həcc ziyarətinə sərf edib.
“Bir gün öz otağımda oturmuşdum, milyarder Fərhad Əhmədov yanıma gəldi. Söhbət əsnasında mənə bir milyon dollar bağışladı. Pulu nəğd formada verdi. Həmin ili 300 min dollar verib, yüzdən çox vətəndaşı ziyarətə göndərdim. Verilən pulu qəpik-qəpik, qənaətlə xərclədim,” – deyə Hacı Qalib Salahzadə açıqlamasında bildirib.
Onun sözlərinə görə, bu yardım tamamilə “Allah yolunda” edilib. Fərhad Əhmədovun Bilgəh qəbiristanlığını da təmir etdirdiyini, oranı “bulvara oxşatdığını” da xüsusi vurğulayıb. “O da, mən də nə etmişəksə, Allah yolunda etmişik,” – deyə Hacı Qalib bildirib.
Amma suallar açıq qalır…
Əsas müzakirə mövzusu qalan 700 min dolların taleyidir. Hacı Qalib bu barədə heç bir açıqlama verməyib. İctimaiyyətdə və mediada yaranan əsas sual budur:
Bu qədər vəsait hara xərcləndi və niyə hesabat verilmir?
Bu məsələ sosial şəbəkələrdə və ictimai dairələrdə ciddi narazılıqla qarşılanıb.
Tanınmış jurnalist və “Bizim Yol” qəzetinin baş redaktoru Bahəddin Həziyev məsələyə sarkazmla və sərt tənqidlə yanaşaraq yazıb:
“Fərhad Əhmədovu qarşıma çıxsa, desəm ‘yeni kitabım nəşriyyatdadır, kömək edin’, cavabında oturub ağlayacaq ki, əli aşağıdır, krizisdir. Amma 1 milyon dolları gətirib gör kimə və nə üçün verib?!”
Bahəddin Həziyev qeyd edir ki, bu puldan bir yoxsul tələbənin təhsil haqqı ödənilməyib, bir gənc alimin konfransa getməsinə yardım olunmayıb, bir məktəbliyə tablet bağışlanmayıb, bir sənət adamına dəstək verilməyib.
“Millətin gözünü açmağa yox, kor etməyə həmişə pul tapılır”, – deyə jurnalist vurğulayır.
“Kitab yox, ziyarət” – bu yanaşma nə vaxta qədər?
Məlumata görə, Hacı Qalib indiyədək 35 dəfə Həcc ziyarətində olub, bu səfərlərə ailə üzvləri, qulluqçuları və hətta aşpazlarını da özü ilə aparıb.
Görünür, Fərhad Əhmədovun milyonundan ayırdığı məbləğlə bu dairə bir qədər də genişlənib.
Bütün bu hadisələr fonunda Musavat.com-un sualı cəmiyyətdəki çoxsaylı narahat səsə çevrilir:
• Niyə mədəniyyət, elm, təhsil sahələrinə deyil, dini şouya bu qədər vəsait ayrılır?
• Bir milyondan niyə cəmiyyətə fayda gətirəcək bir layihə belə çıxmır?
• Qeyri-rəsmi şəkildə verilən pullar niyə ictimai hesabatdan kənarda qalır?
Milyarderə və Hacıya açıq çağırış:
Azərbaycan gəncliyi, ziyalısı, yaradıcı insanları da “Allah yolunda” mübarizə aparır – onlar da ziyarətə gedir, amma onların yolu Bilik ziyarətidir, İşıq ziyarətidir, Elm ziyarətidir!
Fərhad Əhmədov bu dəfə də qəbiristanlığı abadlaşdırmaq əvəzinə bir məktəbi, bir kitabxananı, ya da bir gəncin gələcəyini abadlaşdırsaydı, bəlkə də bu 1 milyon dollar həqiqətən də xalqın duasını qazanardı.
