Bu ölkəyə əsrdə görünməmiş fəlakət YAXINLAŞIR - XƏBƏRDARLIQ EDİLDİ
Son yarım əsrdə görünməmiş siklon Avstraliyanın şərq sahillərinə yaxınlaşır.
Ajans.az xəbər verir ki, bu barədə CNN məlumat yayıb.
Kvinslend və Yeni Cənubi Uels sahillərində kəskin hava şəraitinin martın 7-si cümə günü axşam və ya martın 8-i şənbə günü səhər saatlarında baş verəcəyi gözlənilir. Tropik siklon Alfred adlandırılıb və sinoptiklərin fikrincə, 1-ci kateqoriya statusuna çatacağı gözlənilir. Küləyin sürəti saniyədə 28 metrə çata bilər. Hazırda qasırğa 2,5 milyon əhalisi olan Brisben şəhərinə doğru irəliləyir və nəzərəçarpacaq dərəcədə səngiyib. Bu, əlavə risk yaradır - nəticədə siklonun intensivliyi ancaq arta bilər, - ölkənin baş naziri Entoni Albanese xəbərdarlıq edib.
Burulğan artıq məşhur turizm məkanı olan Qızıl Sahildə 12,3 metrlik rekord dalğalara səbəb olub. Yeni Cənubi Uelsin şimalında güclü külək səbəbindən 4000-ə yaxın ev elektriksiz qalıb. Güclü yağışlar fonunda çaylar məcrasından çıxmağa başlayıb. Bəzi alçaq yaşayış məntəqələri sel təhlükəsi ilə üzləşib. Fırtına dalğaları və sahil eroziya riski var.
Avstraliyada sonuncu dəfə belə fırtına əlli ildən çox əvvəl baş vermişdi. 1974-cü ildə Zoe siklonu Şimal çayları bölgəsində güclü daşqınlara səbəb olub. Yeni Cənubi Uels son on ildə şiddətli daşqınlarla üzləşib və daha çox dağıntılar bölgəyə düzəlməz ziyan vurmaq riski ilə üzləşib.
"Biz bilirik ki, 2017-ci il və təbii ki, 2022-ci il daşqınlarının travmasından sonra cəmiyyətdə narahatlıq və qorxu hissi var”, - deyə, Şimal Sahil naziri Rose Jackson bildirib.
Xüsusilə, Brisbendə, meriyanın hesablamalarına görə, fırtına dalğaları və güclü yağışlar nəticəsində təxminən 20 min mülkə ziyan dəyə bilər. Pis hava şəraiti ərəfəsində şəhər sakinləri ərzaq və su ehtiyatı yığırlar. Məktəblər və çimərliklər bağlanıb, idman oyunları ləğv edilib. Hava və ictimai nəqliyyatın hərəkəti dayandırılıb. Həssas sahil bölgələrində yaşayan sakinlər təxliyə olunmağa çağırılır.
