Azərbaycan bu məhdudiyyətləri aradan qaldırır

Azərbaycan regionda uzun illərdən sonra Ermənistanla yük tranzitinə tətbiq olunan bütün məhdudiyyətləri aradan qaldırıb.

Ajans.az xəbər verir ki, bu barədə məlumatı “Reuters” yayıb.

Prezident İlham Əliyev Qazaxıstanda keçirilən görüşdə bildirib ki, Qazaxıstandan Ermənistana sovet dövründən bəri ilk dəfə keçid edən taxıl yükü bu qərarın rəmzi xarakter daşıyır və Cənubi Qafqazda iqtisadi münasibətlərin normallaşması üçün yeni səhifə açır.

Rəsmi Bakının qərarı həm iqtisadi, həm də siyasi baxımdan mühüm dönüş nöqtəsi kimi dəyərləndirilir. Yük tranzitinin bərpası iki ölkə arasında ticarət əlaqələrinin bərpasına, logistika xətlərinin açılmasına və regionun nəqliyyat inteqrasiyasına təkan verəcək. Ekspertlər hesab edirlər ki, bu addım gələcəkdə Zəngəzur dəhlizi, Qars–İrəvan–Naxçıvan xətti kimi layihələrin reallaşmasına da dolayısı ilə təsir göstərə bilər.

Azərbaycan tərəfi bildirir ki, bu qərar sülh prosesinə real məzmun qazandırmaq, qarşılıqlı etimadı möhkəmləndirmək və regionda uzunmüddətli sabitliyin bərqərar olmasına xidmət edir.

Analitiklərin fikrincə, Bakı və İrəvan arasında münasibətlərin bu istiqamətdə yumşalması həm region ölkələrinin iqtisadi maraqları, həm də Mərkəzi Asiya ilə Avropa arasındakı ticarət yollarının sabitliyi üçün vacib mərhələdir.

Bu addımın davamı olaraq yaxın aylarda Azərbaycan, Ermənistan və Gürcüstan arasında yeni regional iqtisadi formatların müzakirəyə çıxarılması gözlənilir. Regionda real əməkdaşlıq mühitinin yaranması Cənubi Qafqazı uzun illərdən sonra rəqabətdən əməkdaşlığa keçid mərhələsinə gətirə bilər.