Şimali Koreya: “Qreta Tunberqə zərər vurulsa, İsraili nüvə ilə hədələyəcəyik”

Şimali Koreya çərşənbə axşamı dövlət mediası vasitəsilə xəbərdarlıq edib ki, əgər İsrail isveçli iqlim fəalı Qreta Tunberqə qarşı hər hansı zərərli addım atarsa, Pxenyan nüvə qisasını nəzərdən keçirə bilər.

Ajans.az xəbər verir ki,bu sərt bəyanat ilk olaraq Pxenyan Radiosu tərəfindən səsləndirilib və daha sonra ölkənin rəsmi televiziya kanalı Koreya Mərkəzi Televiziyası (KCTV) tərəfindən təkrarlanıb. Verilişlərdə Tunberq İsrailin Qəzza zolağında həyata keçirdiyi hərbi əməliyyatları açıq şəkildə tənqid etdiyinə görə “vicdanın səsi” kimi təqdim olunub.

Dövlət mediasının məlumatına əsasən, Şimali Koreyanın yüksək vəzifəli rəsmiləri iqlim fəalına qarşı istənilən fiziki və ya siyasi hücumu “ciddi təxribat aktı” kimi qiymətləndirəcəklər və bu halda “sionist rejimin ürəyinə cavab zərbəsi endirilə bilər”.

Analitiklərin fikrincə, Pxenyanın İsrail və ABŞ-a qarşı sərt ritorikasına tez-tez rast gəlinir. Lakin bu dəfəki açıqlamada nüvə təhdidinin konkret olaraq Qərb mənşəli bir vətəndaş fəalının təhlükəsizliyi ilə əlaqələndirilməsi nadir və diqqətçəkən haldır. Mütəxəssislər bu bəyanatı Şimali Koreyanın özünü bütün dünyada “anti-imperialist” mövqeyin tərəfdarı və sözçüsü kimi təqdim etməyə çalışmasının bir hissəsi kimi qiymətləndirirlər.

Qeyd edək ki, Qreta Tunberq son aylarda İsrailin Qəzzada apardığı hərbi əməliyyatları sərt tənqid edib və Fələstinlə həmrəylik nümayiş etdirən bir neçə ictimai çıxışı ilə gündəmə gəlib.

İsrail rəsmiləri hələlik Şimali Koreyanın bu açıqlamasına rəsmi cavab verməyib.