Dembele Azərbaycan millisi ilə oynaya bilməyəcək

DÇ-2026-nın seçmə mərhələsində Ukrayna ilə oyunda zədələnən Fransa millisinin üzvü Usman Dembelenin durumu ciddidir.

Ajans.az "RMC Sport"a istinadən xəbər verir ki, arxa bud əzələsindən zədə alan PSJ-nin vingeri 6 həftə meydana çıxa bilməyəcək.

 Bu isə o deməkdir ki, 28 yaşlı futbolçu oktyabrın 10-da Azərbaycan millisi ilə keçiriləcək görüşü buraxmalı olacaq.

 PSJ-nin daha bir futbolçusu, Deziro Due də Fransa millisinin heyətində zədə alıb. Onun isə təxminən 4 həftə yaşıl meydanlardan uzaqda qalacağı bildirilib.

 Qeyd edək ki, oktyabrın 10-da Parisdəki “Park de Prens” stadionunda keçiriləcək Fransa - Azərbaycan matçı Bakı vaxtı ilə saat 22:45-də başlayacaq.