"27-dən çox abidə bərpa edilib" - Tural Novruzov

Tural Novruzov, Şuşa şəhəri Dövlət Qoruğu İdarəsinin icraçı direktoru olaraq, Şuşada işğal dövründə abidələrin vandalizmə məruz qalmasından danışıb.

O bildirib ki, artıq 27-dən çox abidə bərpa edilib və digər abidələr üzrə bərpa prosesi davam edir. Şuşanın “Qafqazın incisi” və Azərbaycanın mədəniyyət paytaxtı kimi tanındığını vurğulayan Novruzov, şəhərin bir çox tanınmış şair və yazıçıların vətəni olduğunu qeyd edib.

Onun sözlərinə görə, Şuşa tarixi olaraq məhəllə sistemi üzrə təşkil olunmuşdu və burada 17 məhəllə mövcud idi. Hər bir məhəllənin özünəməxsus məscidi və meydanı olub. Lakin işğal dövründə bu məscidlərin əksəriyyəti dağıdılıb və bəzilərinin yerlərini müəyyənləşdirmək belə mümkün deyil.

Tural Novruzov bərpa olunmuş abidələrin əvvəlki və sonrakı fotoşəkillərini nümayiş etdirərək, bərpa prosesinin mərhələləri barədə ətraflı məlumat verib. O qeyd edib ki, azadlıqdan sonra ərazidə skanlama və tədqiqat işləri aparılıb, bu işlərə yerli və beynəlxalq mütəxəssislər cəlb olunub. Mütəxəssislər hər ay əraziyə səfər edir və bərpa işləri ilə bağlı rəy bildirirlər.

Hazırda Şuşa şəhəri Dövlət Qoruğu İdarəsi ICOMOS Azərbaycan ilə birgə bərpa prosesi ilə bağlı məlumat kitabçasının nəşri üzərində işləyir.