Güzəşt ləğv olunur- ÇİN MAŞINLARI BAHALAŞIR…?

Ötən il Azərbaycana idxal edilən və satılan hibrid və elektrik avtomobillərinə güzəşt tətbiq edilirdi. Bu il hibrid avtomobillərinə edilən güzəştlər ləğv olundu. Yalnız elektriklə işləyən avtomobillərin idxalı və satışı 1 il müddətinə əlavə dəyər vergisindən (ƏDV) növbəti dəfə azad olunacaq. Bu, “Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb.

Sənədə əsasən, 2026-cı il yanvarın 1-dən 1 il müddətinə yalnız elektrik mühərriki ilə işləyən avtomobillərin idxalı və satışı ƏDV-dən azad edilir.

Ajans.az məsələni geniş araşdırmaq üçün nəqliyyat eksperti Eldəniz Cəfərov ilə əlaqə saxlayıb. 

O bildirib ki, qərardan sonra Çin istehsalı olan avtomobillərin satışında azalma gözlənilmir. Lakin qiymətlərdə yüksəlmə gözləniləndir. Amma bu yalnız bizim ölkəyə aid ola bilməz. Çinin özündə də dövlətin istehsalçılara təklif etdiyi vergi də dəyişir. Bildiyimiz kimi, bizim ölkəmizdə də hibrid avtomobillərə edilən güzəştlər ləğv olunur. Bu da nəticədə qiymət artımına yol açır. 

Ekspert söyləyib ki, ölkənin avtomobil bazarında fəallıq olsa da, əvvəlki qədər yüksək deyil. Bu əsasən də, ikinci əl avtomobil bazarlarında müşahidə edilir.  Güzəşt ləğvindən sonra isə yenilənmə mütləqdir. 

Elməddin Cəfərovun sözlərinə görə, ölkəmizdə elektrikli avtomobillərə maraq çoxdur. Amma bu maşınlar o qədər də məşhur deyil. Çünki infrastruktur zəifdir, ölkə ərazisində enerjidoldurma məntəqələrinin sayı olduqca, aşağıdır. Nəticədə maraq olsa da, məşhurluq əldə etmək çətin olur.