Tramp Yaponiyanı hədələyir : “Amerikanın düyüsünü almayacaqsa..”

ABŞ-ın sabiq prezidenti Donald Tramp Yaponiyanı Amerikanın yetişdirdiyi düyünü almaq istəmədiyini iddia edərək bu ölkənin ixracat məhsullarına qarşı yeni və daha yüksək tariflər tətbiq edəcəyi ilə hədələyib.

Ajans.az CNN-ə istinadən xəbər verir ki,  “Onlar bizim DÜYÜMÜZÜ qəbul etmirlər, halbuki böyük düyü çatışmazlığı yaşayırlar. Başqa sözlə, biz onlara sadəcə bir məktub göndərəcəyik və Yaponiyanı uzun illərdir Ticarət Tərəfdaşımız kimi sevirik,” – deyə Tramp Truth Social platformasında paylaşım edib.

Lakin Trampın “Yaponiya Amerikanın düyüsünü almır” iddiası doğru deyil. ABŞ Siyahıyaalma Bürosunun ticarət məlumatlarına görə, Yaponiya 2023-cü ildə ABŞ-dan 298 milyon dollar dəyərində düyü alıb. Bu ilin yanvar-aprel aylarında isə həmin rəqəm artıq 114 milyon dollar olub.

Yaponiya rəsmilərinin gələcəkdə ABŞ-dan düyü almayacaqları ilə bağlı hər hansı bir bəyanat verib-vermədikləri məlum deyil. Ancaq Yaponiyanın Nazirlər Kabinetinin baş katibi Yosimasa Hayaşi çərşənbə axşamı bildirdi ki, iki ölkə arasında ticarət danışıqları davam edir və Trampın paylaşımından xəbərdardırlar. Lakin bu barədə şərh verməkdən imtina edib.

“ABŞ ilə danışıqların detalları barədə məlumat verməsək də, Yaponiya hər iki tərəf üçün faydalı razılaşma əldə etmək məqsədilə səmimi və dürüst müzakirələri davam etdirməyə qərarlıdır,” – deyə Hayaşi bildirib.

ABŞ-ın sabiq prezidenti Co Baydenin dövründə, 2021-ci ildə ABŞ Ticarət Nümayəndəliyi tərəfindən yayımlanan hesabatda qeyd olunurdu ki, “Yaponiyanın yüksək tənzimlənən və qeyri-şəffaf düyü idxal və paylama sistemi ABŞ ixracatçılarının Yaponiya istehlakçılarına real çıxışını məhdudlaşdırır.” CNN-ə danışan Trampa yaxın bir mənbə bildirib ki, Tramp məhz bu vəziyyəti nəzərdə tutaraq həmin paylaşımı edib. Tramp son çıxışlarında bildirib ki, administrasiyası bəzi xarici ölkələrə yeni tarif dərəcələri ilə bağlı xəbərdarlıq məktubları göndərəcək. Bu açıqlamalar onun aprel ayında “qarşılıqlı” tarifləri müvəqqəti dayandırmasından sonra verilib.

Bazar günü Fox News-a verdiyi müsahibəsində Tramp Yaponiyanı konkret olaraq hədəf göstərərək deyib:
“Əziz Cənab Yaponiya, məsələ budur: avtomobillərinizə 25% tarif tətbiq ediləcək.”

Trampın paylaşımı, həmin “qarşılıqlı” tariflərin 90 günlük dondurulmasının iyulun 9-da başa çatmasına bir neçə gün qalmış edilib. Bu tarixdən sonra tariflərin aqibəti və təsir göstərəcəyi onlarla ölkə hələlik qeyri-müəyyən olaraq qalır. Tramp bu tarifləri elan etməzdən əvvəl Yaponiyanın ixracına minimum 24% tarif tətbiq olunmuşdu. Hazırda isə həmin tariflər universal olaraq 10% səviyyəsindədir.

Ağ Evin Milli İqtisadi Şurasının direktoru Kevin Hassett bazar ertəsi jurnalistlərə bildirib ki, Yaponiyayla danışıqlar davam edir:
“Heç nə yekunlaşmayıb,” – deyə Hassett bildirib. “Tramp nə paylaşsa da, danışıqlar son ana qədər davam edəcək. Əgər çərçivə razılaşması olsa belə, hələ tamamlanacaq məqamlar qalacaq.”