İmamoğlunu gözləyən 4 mümkün ssenari - DETALLAR
İstanbul Böyükşəhər Bələdiyyəsinə (İBB) qarşı terror təşkilatı PKK ilə əlaqələr, korrupsiya və rüşvətxorluq ittihamları əsasında aparılan istintaq çərçivəsində 106 nəfər şübhəli qismində müəyyən edilib. Onlardan 19-u hələ də axtarışdadır, 87 nəfərin isə polis bölmələrində dindirilməsi davam edir.
Ajans.az türk mediasına istinadən xəbər verir ki, İBB rəhbərliyinə yaxın bir sıra şəxslər, o cümlədən Bələdiyyə Başçısının müşaviri və İMM Media A.Ş. İdarə Heyətinin sədri Murat Ongun, Beylikdüzü Bələdiyyə Başçısı Murat Çalık və Əli Nuhoğlu saxlanılıb. Bu şəxslər İstanbul Polis İdarəsinin istintaq çərçivəsində nəzarətə götürdüyü şəxslər arasındadır.
İBB sədri Əkrəm İmamoğlu da tibbi müayinədən keçirilib. O, 20 mart səhəri saxlanılıb və dörd günlük həbs müddətinin ardından 23 mart bazar günü məhkəmə qarşısına çıxacağı gözlənilir.
Mümkün ssenarilər
İmamoğlunun məhkəmədən sonra qarşılaşa biləcəyi dörd əsas ssenari:
- Azadlığa buraxılması – Bu halda o, vəzifəsinə davam edə bilər.
- Vəzifədən azad olunması – Daxili İşlər Nazirliyi istintaqı əsas gətirərək onu işdən kənarlaşdıra və yerinə qəyyum təyin edə bilər.
- Terror ittihamı ilə həbs olunması – Bu halda Daxili İşlər Nazirliyi İstanbul Böyükşəhər Bələdiyyəsinə müvəqqəti rəhbər təyin edə bilər.
- Mütəşəkkil cinayətkar təşkilata üzv olmaq ittihamı ilə həbs olunması – Belə olarsa, İstanbul Böyükşəhər Bələdiyyə Məclisi yeni başçını seçə bilər.
İmamoğlu və digər şübhəlilərə qarşı ittihamlar
İstintaq çərçivəsində İmamoğlu və digər şübhəlilər aşağıdakı ittihamlarla üzləşirlər:
- Cinayət təşkilatının lideri olmaq
- Cinayət təşkilatının üzvü olmaq
- Qəsb
- Rüşvət
- Ağırlaşdırılmış fırıldaqçılıq
- Şəxsi məlumatların qanunsuz əldə edilməsi
- Tender saxtakarlığı
"İmamoğlu İnşaat" şirkəti müsadirə edilib
İstintaq çərçivəsində İmamoğlu İnşaat Ticarət və Sənaye ASC-nin aktivlərinin ələ keçirildiyi açıqlanıb. Baş Prokurorluğun tələbi ilə Sülh Cəza Məhkəməsinin qərarı əsasında şirkətə məxsus 117 daşınmaz əmlak – 19 mağaza, 19 yaşayış evi, 63 mənzil, 8 ofis, 6 iş yeri və 2 torpaq sahəsi müsadirə edilib.
Bundan əlavə, istintaq çərçivəsində bəzi şübhəlilərin sahibkarlara təzyiq göstərdiyi iddia edilir. Capacity AVM sahiblərinin ifadələrinə görə, şübhəlilər onlardan rüşvət tələb edib və tələbləri yerinə yetirilmədiyi halda obyektin zəlzələyə davamlı olmadığı bəhanəsi ilə bağlanacağını bildiriblər.
İstintaq davam edir.
